للبنات حق الرد *** وللشباب حق التعليق

[حنان الكون]

سؤال للبنات اتمنى انكم تردوا عليه وعادي مشاركه الشباب ..؟؟

نلاحظ في بعض محلات النسائيه يشتغلو فيه شباب لبنانيين او سوريين ونلاحظ انه البنت اول ماتسال

البايع عن شي يقولها
تكرم عيونك ,من عيوني ولاتحملي هم ياقمر ,كرمال عيونك.


والبنت تسكت .. او تبتسم .. او تاخذ موقف بس ماتبين
واحيانا يكون البايع مواطن سعودي من اهل البلاد

لو انحطيتي فالموقف هذا والبائع سعودي وش بيكون ردة فعلك

1>كف محترم او بجزمه عـ الراس

2>شتيمه تخلي كرامته مايحتاج بعد

3>نضره استحقار قويه

4>شكرا

5> تشترين المحل كلة

وش رايكم يالبنات ولا مانع من ردود الشباب..؟؟

للبنات حق الرد *** وللشباب حق التعليق ؟؟؟؟؟؟؟؟؟؟؟؟؟؟؟؟؟؟؟؟؟؟

[*توته*]

السلام عليكم..
اختي حنان الكون يعطيك العافية عالموضوع
وعشان اكون صررريحة
انا عن نفسي اذا كان سعودي او غيره انا اتلقى اي كلمة بكلمة شكر دائما........
والله يعطي العافية للجميع انا ودي يكون ولد بلادي هو دايم
اللي يخدم في بلاده....

[لبى قلبي]

بالنسبه لي أتقبلها لأن سياسة السوق تتطلب الشي هذا



بعدين هو ماكفر بالعكس قال كلمتين حلوين بسـ


تقبلي مروري ودمتي بخير

[هزك الشوق]

بـصراحه نقف هنـا لحظه .... هل قـالها تـغزل فـيها ام قـالهـا لكـي يجذب الزبونه لمحـلـه ومثل ماقالت الاخـت الي فوق

(( سياسة السوق تتطلب الشي هذا))

وعلى قولتهم التجاره شطاره وهذا مطلوب بالتجاره أن يقول كـلام حلو ليجذب الزبون

بـس الـبنت الي محترمـه حـالهـا ما تهمهـا الكـلام هـذا والي واثقه من نفسها على قولتهم ياجبل ما يهزك ريــح

والبناانيين والسوريين يمكن متعودين على الكـلام المعسوول شوي مو مثلـنـا هههههه

بـس الشاب السعودي الي محترم نفسه قبل كـل شي رايح يقوول تامرين أخــتي أو تـامرين ياعمه أو تـامرين ياخاله ...

يعني من الاساليب الي اعتدنـا علـيها

الغاليه صاحبة الطرح الـقـيم

حنـان الكون

حبـيت اشارك بهذا الموضوع بما اتحتي لـنـا من فرصـه للمشاركه

دمتي بود وننتظر جديدك القـادم

[BaByNeT]

موضوع صريح وقوي

اصلا كلهم رجال يعني مافي فرق

كل شيء يعتمد على الأساس...


أبن البلد يعرف الشيء العيب يعرف عاداتنا وتقاليدنا

[النداوي]

حنان الكون

يعطيك ربي العافيهـ على الطرح الرآآقي..

اتوقع اغلب البنات يتقبلوها من الأجنبي أكثر من السعودي ..

مادري البنات يتقوعون أن نية السعودي غير عن نية الأجنبي او وش السبب ..

ويمكن البنت لما تتقبل الكلمات هذي برحابة صدر يكون لها سياسه ثانيهـ ..

لأن صار لي موقف قبل العيد في مركز نسائي ..

وقتها كنت في المحل واشوف بعض الملابس لوحدي الي يشتغلون بالمحل كلهم قريب عند بنات يدللونهم من الكلام الي ذكرتي فووقـ ..

اما انا الله يرحم حالي حتى العامل وقتها يقول لخويهـ شكل هذا راح يشتري المركز كله يستهبل خخخخخخخخ ..

الي صار البنات متقبلين الوضع عاادي بس اكتشفت بعض من مكرهمـ .

يوم وصلو عند الحساب نشبووو للمحاسب الا غصب ينزل حتى ان الي برى وقفو يحسبون صايره مشكلهـ ..

ومع الواسطات نزل لهم خمسين ريال خخخخخخخخخخ ..

فـ يمكن ان هذي سياسه من البنات يتقبلو الكلماات الحلووهـ بس يطلعونها من الطرف لاثاني الحساب ....؟

لكن لو كان سعودي ماكان صار الي صااار ..

نسبه كبيرهـ من بنات مجتمعنا أما انهم يثقون في الأجنبي ثقه عميا او أنهم يلاقون فيهم شي مو بالشاب السعودي ..

ع العموم مابي اطول لكن ترى الأجنبي والسعودي كلهم شباب طائش الا من هدى الله ..


حناان الكون تسلمين ع الموضوع الجميل ..

تحياتي وتقديري ..

[لبى قلبي]

بصراحه رد الاخ اللي فوقي >>نسيت اسمه وربي:fahd1 (95):


فيه نوع من الظلم البنات بطبعها تحب الكلام الحلو سواء من السعودي ولا حتى البقالي يعني مو سالفه سعودي أو غيره

بس الكل يمشي حسب مصلحته وكلنا فاهمين هالشئ



بالعربي لما يجي البائع يقول تامرين ياعسل ولا ياقمر ولا ولا هل هدفه لازم يكون سيئ؟


لا بل العكس بكذا يمشي بضاعته ويرضي زبونته ويرضي الطرفين
وهذا الشي لمصلحته



بالنسبه لي أنا أشجع السعوديين أكثر لحد يفهم غلط ماأشجع المغازل ترى :1 (80):


قصدي أنو الكلمات الحلوه لو طلعت من ابن البلد أحلى وأطعم ويمكن

تخليني أشتري المحل كله >>>>امزح ترى:bubble:




تحياتي

[هزك الشوق]

الاخت الي فوق

بعد التحيـه والاحترام

مو لهدرجه توصل صاحب المـحل يقول مثل هذي الكلمات

(( تامرين ياعسل ولا ياقمر))

بستطاعته قول الكثير من الكلمات ليجذب زبونته بدون هذا التغزل الواضح كوضوح الـشمس بالسمـاء الصافـيه

وهـذي الكلمـات بحد ذاتهـا غـزل وهنـا الشيطـان يتفنن بألاعيبه
والشيطان حريص كـل الحرص لمثـل هذي الاشياء

وأصلآ البنت المحترمه ما تبدل مصلحتهـا على نفسهـا !!!!!

عـلى العـموم

كلآ على نـيته

اطيب تـحيه اقدمـهـا لكي يالي فوق

[لبى قلبي]

مو لهدرجه توصل صاحب المـحل يقول مثل هذي الكلمات

(( تامرين ياعسل ولا ياقمر))

ياغلاتي انا قلت مثلاً أقصد ضرب مثال بس مو أكثرلان بيني وبينك محد قد قالي كلام حلو عشان أعرف الغزل من غيره >>امزح هع:1 (66):
بستطاعته قول الكثير من الكلمات ليجذب زبونته بدون هذا التغزل الواضح كوضوح الـشمس بالسمـاء الصافـيه

معكـ حق بس البعض تعود على هالكلام مو شرط لزبونه لكل الناس وعلى قولتك كل واحد حسب نيته مع اني أشوف ان الكلمات هذي لاتقدم ولاتأخر يعني زي ماهو الله لايهينه:1 (34):
وأصلآ البنت المحترمه ما تبدل مصلحتهـا على نفسهـا !!!!!

والله انك صادق وأقسم لك بالله إني أعرف بنات يقصدون أماكن معينه مو عشان بيع وشراء عشان يسمعون ويمازحون البائع ويمكن لغرض في نفسهم الله أعلم

اطيب تـحيه اقدمـهـا لكي يالي فوق

وأنا دبل أطيب التحايا لك ياللي فوق بس خفف من وزنك شوي تراك ثقلت :bubble:

[عبودي&احلاسعودي]

الشاب الاجنبي اي زبون يجيه يقول له ترك عينك او اي شي ثاني...




اما الشاب السعودي:مايقول من عيوني الا للبنات الحلوين((القطع))

بس لو تجيه عجوز اتحدا يقول شي زين

قسم بالله تنشب له العجوز

عاد ماتصدق خبر




يسلمو قلبووووووووو


على الطرح الرووووووووعه


وننتضر جديد اقلامك المبهره


دمتي بود

[هزك الشوق]

الغــاليه الي بالمشاركه (( 9 ))

ياغلاتي

عزيزتي الغاليه شكل عند لبس في الموضوع

أنـا ولد مو بـنت وأذا كـنتي ما انتبهتي للأسم فأسمي ((x-man))

man <----<< تعني رجل

x<---<< مجهول

ويطلع أسمـي ((الرجل المجهول)) ^_^

على العموم يالغاليه مو هذ الموهـيم

الموهيم هو ان نطلع بفائده بهذا الموضوع

انا قلت مثلاً أقصد ضرب مثال بس مو أكثر

انـا أعرف أنك تقصدين ضرب أمثله لـي .... لـكن تقدرين تقولـين أمـثله أحلى مـن أكذا وبسلووب راقـي أنـا ما اختلف معاكِ ان كلمة عسل ولا قمر مو حلوه بالعكـس كـل واحد يدور على هالكلمات التي تنعـش النفـس عند سماعهـا ولكـن لـيس هنـا بهذا المحـل مكانهـا .!!!

محد قد قالي كلام حلو عشان أعرف الغزل من غيره

كـل غزال يستاهل من يتغزل فـيه وأنتي تستاهلـينن الغزل والتغني بالغزال لـكن مثـل ما قـلت محلـه مو في محل المـلابس ..!!!

بس البعض تعود على هالكلام مو شرط لزبونه لكل الناس

مشاء الله متعود علـيها < معذور هالولد الرومنسي ^_^

طيب مثال .... فيه واحد من الاشخاص الي متعودين على الكـلام الحلو على قولتك أو حصلك انـتي بالشارع وقال لـك يا عسل او يا قمر وين الشارع الفلانــي أو السوق الفلانـي ...ومعك أمك .؟ < قسم قسمات ان اومك بالجزمه على راس الرومنسي هذا هههههههههه تعلمه كـيف يسئل الناس صح ^_^

مو ذابحه او خايف ما تدرين علـيه أذا قالك
((( لو سمحتو وين الشارع الفلاني او السوق الفلانـي ... بكـل أحترام )))

كل واحد حسب نيته مع اني أشوف ان الكلمات هذي لاتقدم ولاتأخر

بالنقطه هذي أتفق مـعـاكي أن الأعمال بالنيات وكل امرآ ما نوى

لـكن تفرق الكلـمه هذي عن كل الكلمـات

نضرب امثـله لـكي

صاحب محل مثل ما طرح بالموضوع ..

جت زبونه وطلبت قماش من الاقمشه قـال لـها صاحب المحـل .
تامرين ياقمـر أو ياعسل أو ولو تكرم عينك أو من عيوني ......ألخ

وصاحب محـل أخر

جاته زبونه وطلبت قمـاش من الاقمشه وقال لـها صاحب المحـل .
تـامرين أخـتي أو ياعمه أو ياخاله أو ان شاء الله بحضره لك دقيقه ..ألخ


هنـا بالمثـال الاول يفتـح ابواب غنى عنهـا صاحب المحل أذا قالهـا بنـيه صالحه مثاال تظن أن الـبنت هذي يتغزل فـيها تتمـيع عنده وتسوي حركـات مالها نهااايه تضـر شخصيتها أمـام الجمـيع وهـي ما تدري وتسئ سمعت المحـل.

وهنـا سببها كلمه قـالهـــــا صاحب المـحل ...!!!!!


أما المثال الثانـي تغـلق أبواب التغزل وتفتح أبواب الاحترام والتقدير بـين صاحب المحل وزبونته.

وأقسم لك بالله إني أعرف بنات يقصدون أماكن معينه مو عشان بيع وشراء عشان يسمعون ويمازحون البائع ويمكن لغرض في نفسهم الله أعلم

وهذا الي حبيت أوصــل لــه . أن هذي الكلمات تفتح أبواب كثيره لا تحصى ولا تعد...!

وفي الاخـير أستمتعت كثيره بالمناقشه

وأذا تبقى من مناقشات فتأكدي بسعد كثيرآ بالتحاور

لكي من الود الكـثير

[دانة البحر]

الشاب الاجنبي اي زبون يجيه يقول له ترك عينك او اي شي ثاني...




اما الشاب السعودي:مايقول من عيوني الا للبنات الحلوين((القطع))

بس لو تجيه عجوز اتحدا يقول شي زين

صدقت اخوي عبودي وانا اوافقك الرأي