قصيده زوج في زوجة .... !!!

[السابح]

هذه قصيده لزوج في زوجته وهو يذمها على ما فعلت

ويوجد رد للزوجه على هذه القصيده سوف اضعها لاحقاً



لا ردك الله لا ولا اطلـب تـرديـن
ادعي عليـك بعثـرة فـي صلاتـي
عثـره تشلـك مـا بعدهـا تقوميـن
يـا قاتلتنـي يـوم صرتـي حياتـي
خدان لـك بالقلـب كانـت بساتيـن
وريضـان وغصونـا بهـا يانعاتـي
كنتي مناة القلـب والـروح والعيـن
واليـوم عينـك يعلهـا مـا تبـاتـي
كنت أحسبك للعهـد والحـب توفيـن
قلتي الغدر بالحـب ماهـي بسواتـي
وحلفتي يميـن الله مـا منـك اثنتيـن
وانـك مـلاك دون كـل البنـاتـي
وانك علـى عهـد المـودة تسيريـن
ولا تسمعين أهل الحسـد والوشاتـي
وصار اليمين ستـار خلفـه تواريـن
ورماح غـدرك بالخفـا مشرعاتـي
وبان الغدر سـم جـرى بالشراييـن
الله عسـى يسقيـك سـم الفعـاتـي
كلي سقيتـك حـب واليـوم تنسيـن
تقوليـن حلـم ايـام واليـوم فاتـي
خذتي الهوى لعبه علـى مـا تحبيـن
ليـن عصفـت بالهـوى عاصفاتـي
من زينك يـا بنـت بالشعـر تزييـن
مـن صـورك بابياتـه الطايـلاتـي
انا من غرامي قلـت كانـك تذكريـن
قلت الخجل صاب البدر مـن مناتـي
وصرتي بشعري في العذاري تباهيـن
تقولين انا شمس العصر في حلاتـي
زينتك بشعـري ولا غربـك الزيـن
ما زانتك صبغـات حمـر الشفاتـي
صورتك بالشعـر حـزام ورياحيـن
واثرك هضاب وشوك ما به هداتـي
رسمتك سحابـه خيـر قطـر تنفيـن
فزت لك الصحراء زهـور ونباتـي
رسمتـك مهـاه للجميلـه تقـوديـن
واثرك قطيعـه وضيعتهـا الرعاتـي
واثرك غراب يوم سـدل الجناحيـن
كنت احسب اني شايف لـي قطاتـي
بالشعر غليتـك علـى كـل غالييـن
واثـرك دنيـه وتعشقيـن الدنـاتـي
وبالشعـر عاتبتـك عتـاب المحبيـن
انا من يسوم الروح لـك يـا غناتـي
توسلت لك خايف على حـب عاميـن
عاميـن لكـن فـي حسابـي مئاتـي
ناديت لكـن لـي ابـد مـا تسمعيـن
عمري وروحي فكـري فـي ثباتـي
حذراك للشينـات عمـري تماشيـن
عديمـات اصـل اخلاقهـن دانياتـي
غاب الولي عنهـن ولعبـن بحبليـن
يا خـس واليهـن وخـس الولاتـي
ما همهن في الناس زيـن ولا شيـن
وقلوبهـن مـن حقدهـن مظلماتـي
وقلتـي وربـك لـو يكونـا ملاييـن
ما غيـرن بالطباعهـن مـن سماتـي
تحسبيـن انـك بالمهـافـه ترقـيـن
كيـف الصعـود يكـون للهاوياتـي
وخنتي وبعتـي كـل عهـد واياميـن
ما عاد يفـرق بيـن ماضـي واتـي
وصرتي مثل غيرك برخص تبيعيـن
يا مرخصتني ما بقـى لـك غلاتـي
صبري نفذ واليـوم ثـارت براكيـن
مظلوم انـا وباكـر تحـل ادعواتـي
سمعي عسى من بعدها مـا تسمعيـن
سمعي دعا من صار قلبـه حصاتـي
ادعي عسى من ناضرك ما تشوفيـن
وتطحن بك الايـام طحـن الرحاتـي
وعساك عوق منه مـا عـاد تبريـن
عوق تشافـق لـه قلـوب العداتـي
ويالله عسى يحتـار فيـك المداويـن
تبيـن الممـات ولا يجيـك المماتـي
ويالله عسى كـف الندامـه تعضيـن
تندميـن يـوم انـه يفـوت الفواتـي
وتبكين دم يسيـل مـن مقلـة العيـن
وتحتار امـك عـن عنـاك وتحاتـي
عسى ما تلاقي من له القلـب تهديـن
وان حصل ادعـي عسـاك الشتاتـي
يا بلوة اللـي وسـط بيتـه تعيشيـن
ساهي وحوله شب جمـر الغضاتـي
عسـى بعمـرك ساعـه مـا تهنيـن
وتمضي حياتك بيـن هـم وشقاتـي
يا بنـت قلبـي ويـن مثلـه تلاقيـن
قلبا عطاك الحـب مـا قـال هاتـي
جيتك وروحـي شلتهـا لـك بكفيـن
وفي التاليه رمـح الخيانـه جزاتـي
يالله عسـاك النـار يـا أم وجهيـن
كله انكشـف لا مـا تفيـد العباتـي
ويالله عسى تلبسـك جـن وشياطيـن
وتكونين مدعـاة الحكـي والشماتـي
يـا حيـة رقطـا تقـود الثعابـيـن
باكـر تحـن ايـامـك المعتمـاتـي
وباكر علـى فعلـك بمثلـه تجازيـن
ظلم المشاعر مـا تحكمـه قضاتـي
بينـي وبينـك تحكـم ايـام وسنيـن
وانا شاهدي قلبا مـن الغـدر ماتـي
ويـا دمعـة التمسـاح لالا تذرفيـن
العيـون رغـم ادموعهـا كاذبـاتـي
لا ما عرفتي الحـب لا مـا تحسيـن
وغدرك تعدى غـدر ذيـب الفلاتـي
الذيب يعـوي قبـل يغـدر بمسكيـن
وانتي غدرتي خافقـي فـي سباتـي
لو كان غدرك في كفـوف الموازيـن
لكـان رجـح كـل غـدر البنـاتـي
انتي السبـب سقتـي علـى القلـب جرحين
غدر الغرام وموجع الذكرياتي
وانتي السبـب واليـوم لالا تلوميـن
وان جاك باكر شوفي اشلـون يأتـي
والله لاكتب وافضحك فـي دواويـن
وارقص واغني يوم خبـر الوفاتـي
وارسم لاهل العشـق قلبـا وسهميـن
وقصة خيانه مـا روتهـا الرواتـي
ويمين لانشر فـوق اسمـك عناويـن
واشهرك من قاصي اليمـن للفراتـي
ومن غرب هالدنيا الى قاصي الصين
ديـوان غـدر فيـه كـل اللغـاتـي
والبادي اظلـم سنـة العيـن بالعيـن
والا فـذي لا عادتـي ولا صفاتـي
ويا شبـه انسانـه بـرأس ورجليـن
اعـوذ بالرحمـن منـك بصـلاتـي

[العندليب]

السابح
مشكور على هذا النقل الرائع
في الابيات روعه وجمال لكنها شديدة اللهجه
وانا اعترض على أغلب الابيات لان فيها نكران للعشره
نكران لأجمل الايام التي قضاها مع شريكة حياته
لأن من حب لا يكره ففي الابيات نبرة كره ولو ان الشعراء يقولون مالا يفعلون
احتم ماكتبت ومانقلت ومااخترت
تقبل كل احتراماتي ياغالي
اخوك العندليب

[السابح]

مشرفنا العندليب

انا معك انه فيه بعض الابيات القاسيه والجارحه نوعا ما
وانا معك فيما ذكرت ان العشره ما تهون بين الزوجين

لكن اذا سمعت او قرات الرد من الزوجه فلن تستغرب ذلك
وسوف انشره لاحقا باذن الله .


تقبل تحياتي

[السيل]

تسلم ايدينك اخوي على النقل الرائع لهذه القصيدة
أخوك السيل

[الـــهـلالــيـه]

صح لساااااااااااااااانك



على هالقصيده



:1 (32): :1 (32): :1 (32): :1 (32): :1 (32): :1 (32): :1 (32): :1 (32): :1 (32): :1 (32): :1 (32): :1 (32): :

:fahd1 (75): :fahd1 (75): :fahd1 (75): :fahd1 (75): :fahd1 (75): :fahd1 (75): :fahd1 (75):


:fahd1 (13): :fahd1 (13): :fahd1 (13): :fahd1 (13): :fahd1 (13):


تقبل مروري

تحيااااتي


الهلاليه